Hvað eru hægri öfgar?

Um helgina var kosið í Þýskalandi og íslenskir fjölmiðlar stukku upp og fóru að tala um hægri öfgaflokkinn AFD sem nú er orðinn næst stærstur.

Hér er tengill á viðtal við formann (eða forkonu) AFD þar sem hún ræðir stefnumál sín á  bloomberg. Þar kemur fram að hún skilgreinir flokk sinn sem Frjálshyggju Íhaldsflokk.  Frjáls viðskipti, lægri skatta en á sama tíma halda í það gamla sem er gott og hefur reynst Þjóðverjum vel.

Þegar hún var beðin um að nefna þrjú aðalstefnumál nefndi hún eftirfarandi:

 

1. Verja landamærin með landamæragæslu.   (sama og íslenska ríkisstjórnin er nú byrjuð að gera)
2. Lækka skatta. (Vilja það ekki allir?)
3. Ræsa aftur kjarnorkuverin. (Af hverju var slökkt á þeim?  Er ekki orkukreppa í Þýskalandi)

 

Hvað er svo öfgakennt við þetta? Eru það orðnir öfgar að ríki hafi virk landamæri? Eiga ríki að halda hælisleitendum þegar engin neyð blasir lengur við í heimalandinu?  Hér á landi fá flóttamenn ekki hæli nema slík neyð blasi við.  Hvað svo með glæpaölduna sem er risin í þýskalandi eftir að öll landamæri voru opnuð.  Er ekki eðlilegt að reynt sé að spyrna við því.  Hátt í 90% þjóðverja finnst þeir hafi gengið of langt í þessum málum.  Eru þeir öfgafólk?

Eru það öfgar að ríki lækki orkuverð hjá sér þegar þau geta. T.d. með að ræsa aftur kjarnorkuverunum sem var lokað rétt fyrir núverandi orkukreppu.  Eru öfgar að vilja ekki óáreiðanlega háværa vindmyllu í bakgarðinn hjá sér, sem virkar bara þegar blæs?

Eru öfgar að  lækka skatta?  Eru það allt í einu orðnir öfgar að ætla að gera Þýskaland aftur samkeppnishæft og stöðva flótta stórfyrirtækja úr landi?

 

Eitthvað segir mér að öfgarnir séu frekar í hina áttina.  Það voru öfgar að galopna landamæri Evrópu eins og Andrea Merkel gerði.  Það voru öfgar að gera Þýskaland algjörlega háð gas-innflutningi frá Rússlandi og að voru öfgar að loka kjarnorkuverum án þess að hafa aðra áreiðanlega orkuframleiðslu tilbúna. Ástæðan fyrir öllu þessu hægra öfga tali er einfaldlega sú að þeir sem tala með þeim hætti eru að reyna að fá fólk til að hætta að hlusta, hætta að fylgjast með og fela sig í skotgröfum vanþekkingar.

 

En hvað öfga hægri?  Hvar ætli Nasistarnir hafi t.d. verið á skalanum?

 

Svarið gæti komið mörgum á óvart, því Hitler var öfga vinstri maður en ekki til hægri.  Hann byrjaði pólitískan feril sinn sem hluti af marxískri uppreisn í bæjaralandi. (sem hann afneitaði síðar) Flokkurinn hans var sósíalistaflokkur (National Socialist Party) og þegar hann komst til valda tók hann yfir alla þætti samfélagsins (sambærilegt og Stalín).  Utan nasistaflokksins og flokksviljans hafði enginn frelsi. Engin skoðun var leyfð nema ríkisskoðunin og enginn mátti framleiða sem ríkið vildi ekki.  Enginn mátti skipta um vinnu nema með leyfi ríkisins og enginn mátti ráða neinn nema með leyfi ríkisins.  Enginn mátti selja neinum neitt nema fyrir það verð sem ríkið vildi, og enginn mátti fá borgað meira en ríkið leyfði.  Munurinn á kommúnisma Stalíns og sósíalisma Hitlers fólst fyrst og fremst í því að kommúnisma-sósíalisminn var uppnuminn af stéttum og hitlers-sósíalisminn var uppnuminn af kynþáttum.  Báðir hötuðu frjálshyggjuna og losuðu sig við allar slíkar (rang)hugmyndir í gúllökkum eða útrýmingabúðum.  

 

Orðið hægri - öfga var ekki notað fyrr en eftir seinni heimsstyrjöldina. Annað hefði ekki verið hægt því hvorki Hitler eða Mússólíni nokkurn tíman skilgreint sig sem hægri. Tilurð þessa orðs á án efa upptök hjá gamla-sovét áróðursmaskínunni og öðrum sósíalistum sem vildu fjarlægja sig og sína stefnu Nasistunum eins og hægt var.  Því ekki þá bara endurskilgreina hvað hægri-vinstri þýddi og klína alræðishyggjunni á andstæðinginn.  Endurskilgreina öfgavinstrimanninn Hitler sem  lengst til hægri því honum samdi svo illa við hinn öfgavinstrimanninn hann Stalín.

Abrakadapra púff.  Orwelskt trikk þar sem ráðist er á tungumálið með að breyta merkingu orða í andstöðu sína.  Afleiðingin er brenglun málsins í þeim tilgangi að rugla fólk í ríminu og lýðskrumurum að afvegaleiða það. 

Athugasemdir

[Ásgrímur Hartmannsson, 27.2.2025 kl. 20:11]

Tommy Robinson lendir reglulega í steininum fyrir hægri-öfgar.

Þær felast í andúð hans á barna-nauðgara gengjum.

Gefur satt að segja afar jákvæða mynd af hægri-öfgamannesku.

[Trausti (IP-tala skráð) 27.2.2025 kl. 20:39]

Góð grein og athyglisverð hjá þér Jóhannes .. Vekur spurning um íslenska fjölmiðla sem hamra á hægri öfgum í þeirra fréttatímum og svo erum við komin með USAID uppljóstrunum sem þarf að kanna frekar hvort slíkar peningagreiðslur hafa ratað til Íslands. Ætti það ekki að vera einfalt mál í sambandi við reglur bankana um peningaþvott? 

[Elís (IP-tala skráð) 4.3.2025 kl. 01:14]

Hvað skilgreiningr varðar, þá eru það oft ekki stefnumálin ein sem skilgreina stjórnmálahreyfingar.

Þegar hægri öfgar eru einhver stimpill sem stjórnmálahreyfing fær er það vegna þeirra skoðana sem fólkið hefur sem hreyfingin sækir styrk sinn til

Og þegar á það er litið er AFD vettvangur fyrir þá sem ekki finna sig innan hefðbundnu hægri flokkanna sem eru ekki nógu íhaldssamir og ekki nógu þjóðernissinnaðir

En ef til vill eru þeir "róttækir" hægri flokkar en þar sem róttækni er andstæða íhalds í íslenskri tungu þá er varla hægt að tala um þá sem slíka en öfgar eru alls ekki slæmar endilega, og margir sem gætu sagt að góður árangur næðist aðeins í keppnisíþróttum vegna öfga hvað varðar æfingar og skipulag. En þegar talað er um öfga þá er það vegna árangurs sem er fenginn á kostnað einhvers annars sem hefðbundna hægrið vildi ekki segja skilið við til að halda jafnvægi og með því á ég við frjálslyndari mál og alþjóðamál.

Og öfga hægriflokkar mega vera sáttir meðan þeir eru ekki  skilgreindir öfga íhalds flokkar sem væri rettara enda "hægri" regnhlífarhugtak í pólitík og væri villandi að ef AFD væri á íslandi yrði það hægri flokkur eins og Sjálfstæðisflokkur og Viðreisn en eru systurflokkur Miðflokksinns og þar með held ég að tilvistarkreppa greinarhöfundar verði vart meiri þegar hann virðist einna helst vera bara miðjuðjumoðari og skil ég vel að hann telji á sér brotið verandi jafn mikill vinstri maður og hann er hægri maður!